YARAT MƏRKƏZİ: FRONT İNTERAKTİV PERFORMANS – KRİSTİAN FALSNAES (DANİMARKA)

YARAT Müasir İncəsənət Məkanı böyük məmnuniyyətlə sizi danimarkalı rəssam Kristian Falsnaesin "Front" adlı interaktiv performansına dəvət edir. Əsrarəngiz layihənin təqdimatı oktyabrın 1-i, saat 14:00-da YARAT Müasir İncəsənət Mərkəzində baş tutacaq! 

Performans Kristian Falsnaesin yaradıcılığının əsasını təşkil edir. Tədqiqat obyekti və səhnəciklərinin əsas “materialı” – insandır.  Onun çıxışları canlı və ya video şəklində, tamaşaçıların iştirakı ilə və ya iştirakı olmadan təqdim olunur. Tamaşaçıların fəal iştirakı ilə yaratdığı teatral, hətta çox vaxt absurd performanslarında, o, "Bu an baş verənləri, bu anı biz uzun zamandır gözləyirdik!" kimi ruhlandırıcı sözlərlə coşqunluq yaradır.

"Front" iri həcmli qurğuların davamlı olaraq spreylə boyandığı, parçalanaraq şəhər içində nümayiş etdirildiyi, daha sonra isə yenidən qurularaq yeni forma aldığı kollektiv performansdır. Rəssam üzərinə rejissor rolunu götürərək, təlimatları ilə səhnə və tamaşaçılar arasındakı estetik səddi aradan qaldırır. 

YARAT tamaşaçıların əsərlərin yaradılmasında iştirak etməsi üçün platforma təşkil edir. Rəssam və tamaşaçıların müştərək işi olan heykəltəraşlıq əsəri kollektiv performansdan xatirə kimi yaradıldığı yerdə qalır.

Performansdakı hərəkətlər fərd və qrup, rəssam və onun izləyiciləri arasındakı münasibət haqqında suallar doğuran ikimənalı hislər və təəssürat yaradır. Falsnaes sosial normalar, qrup davranışının dinamikası, güclərin nisbəti, müəlliflik, gender rolları və digər bu kimi məsələlərin mahiyyətinə varmağa, onları dərindən başa düşməyə sövq edir. Bu araşdırma həvəsinin bir forması, rəssamın tamaşaçılarını istiqamətləndirmək üçün didaktik rəssamlıqdan tutmuş aktyorluğa qədər, avtoritar liderdən tutmuş konferansye, kloun, quldur və səfilə qədər müxtəlif rollara girdiyi bədahətən yaranmış performans silsilərində öz əksini tapıb. Bununla belə, Falsnaes özünün fiziki iştirak etmədiyi, telefon rabitəsi və ya dublyordan istifadə edərək yaratdığı performativ formatlarını da inkişaf etdirir. Bəzi hallarda, o, performansdakı konkret situasiyanın müstəqil video süjetlərin yaradılmasına necə kömək etdiyini sınaqdan keçirir.

Kristian Falsnaes 1980-ci ildə Kopenhagendə (Danimarka) anadan olub, hazırda isə Berlində yaşayıb-yaradır. O, 2003-cü ildə Kopenhagen Universitetinin, 2011-ci ildə isə Vyanada Rəssamlıq Akademiyasının məzunu olub. Falsnaesin əsərləri beynəlxalq səviyyədə sərgilənmişdir: "Castlefield" qalereyası, Mançester; Dövlət İncəsənət Muzeyi, Kopenhagen; "1646" İncəsənət Məkanı, Haaqa; "Juan & Patrisia Vergez" kolleksiyası, Buenos-Ayres; "Kunstverein Braunschweig", Almaniya; "KİOSK", Qent; "Bielefelder Kunstverein" İncəsənət Mərkəzi, Bilefeld; PSM İncəsənət Mərkəzi, Berlin; "Art-Bazel" yarmarkası, İsveçrə; "KW" Müasir İncəsənət İnstitutu, Berlin; "DREİ", Köln; "21'er Haus", Vyana; "OSLO10", Bazel; "Skånes Konstförening" qalereyası, Malmö, İsveç və "Kunstraum Niederösterreich" qalereyası, Vyana.

Layihə Mədəniyyət və İdarə Laboratoriyası tərəfindən idarə olunan və Cənubi Qafqaz üzrə İsveçrə Əməkdaşlıq Ofisinin maliyyə dəstəyi ilə "Cənubi Qafqazda Regional İncəsənət və Mədəniyyət Layihəsi" çərçivəsində Cənubi Qafqaz Müasir Rəqs və Eksperimental İncəsənət Festivalı (Tbilisi) (www.dancearttbilisi.ge) ilə birgə həyata keçirilir.

Tarix: 29 sentyabr 2016

Vaxt: 14:00

Məkan: YARAT Müasir İncəsənət Mərkəzinin daxilində və ətrafında

Giriş sərbəstdir

FACEBOOK